சித்திரம் பேசுதடி

யானை - Pen Sketch

2010-01-29T16:38:00.000-08:00

"கஜமுகனைக் காணுகையில் என்ன ஒரு கம்பீரம். அகண்ட முறமெனக் காதும், மாமலை எனப் பெருத்த உடலும், கற்தூண்களெனக் கால்களில் வீரு கொண்ட நடையும் ... சிறியவர் முதல் பெரியவர் வரை சட்டென எவரையும் கவர்ந்திடுமே".

நேற்றுக் கிடைத்த சிறு இடைவெளியில் வரைந்த இரண்டாவது படம். 10x8 வரைதாளில் அரை மணிநேரத்தில் பேனா கொண்டு அவுட்லைன் போட்டு, பின்னர் ஷேட்ஸ். அவ்ளோதான் :)

சிம்பான்ஸி - Pen sketch

2010-01-29T16:27:00.000-08:00

"என்னைக் கொஞ்சம் நிம்மதியாத் தூங்க விடுங்களேன். மனிதனா மாறி உங்களைப் போல அல்லல் பட நான் ரெடி இல்ல, ரெடி இல்ல, ரெடி இல்ல ..."

ரொம்ப நாள் ஆச்சே என நேற்று வரைய அமர்ந்தேன். வழக்கம் போல நூலக புத்தகங்கள் இரைந்து கிடக்க, நமக்கு வசதியாய் இருக்கும் இரண்டு படங்களைத் தேர்வு செய்து கொண்டேன். முதலில் 'நம்மவர்'. அசத்தலாகப் படுத்திருக்கும் அந்தச் சாயலே படத்தை வரையத் தூண்டியது.

10x4 வரைதாளில் அரை மணிநேரத்தில் பேனாவில் சிம்பன்ஸியின் ஆனந்த சயனம் :)

மனம் கவர்ந்த ஓவியர்கள்

2009-04-01T20:46:00.000-07:00

ஒருவர் கையெழுத்தை வைத்து இன்னார் எழுதினார் என்று கண்டுபிடிக்கிறது ஓரளவுக்கு சுலபம் தான். சில நேரங்களில், இது அச்சு அசல் அவரோட கையெழுத்து மாதிரியே இருக்கே என்று நம் நண்பர்கள் சொல்லிக் கேள்விப் படுகிறோம், அல்லது நாமே பார்க்கிறோம். ஆனால் ஓவிய‌த்தைப் பொருத்த‌வ‌ரையில், இவர் அவ‌ர் மாதிரியே வ‌ரைகிறார் என்று இது வ‌ரை நாம் கேள்விப்பட்டதில்லை.

ஒவ்வொருத்தரும் தங்களுக்கென்று த‌னி ஸ்டைல் வ‌குத்துக் கொண்டார்க‌ள். எப்ப‌டி இந்த‌ மாதிரி ஒரு நிலை ஏற்ப‌டுத்திக் கொண்டார்க‌ள் என்று ப‌ல‌ நாள் விய‌ந்திருக்கிறேன். கையெழுத்துப் போடுவ‌து கூட‌ ஒரு க‌லை தான். சில‌ர் கையெழுத்து அட்ட‌காச‌மா இருக்கும். ரூம் போட்டு, ப்ராக்டிஸ் ப‌ண்ணிருப்பார்க‌ளோ என்று கூட எண்ண‌த் தோன்றும். அதே போல‌ ஓவிய‌ர்க‌ளும் சில‌ ப‌யிற்சிக‌ள் மேற்கொண்டிருக்க‌லாம், வித‌ வித‌மா வ‌ரைந்து பார்த்து, ஒரு க‌ட்ட‌த்தில் திருப்தி ஏற்ப‌டுகையில், அதையே base style ஆக‌ ஆக்கியிருக்க‌லாம் என்று பின்னாளில் அறிந்து கொண்டேன்.

அந்த கால கட்டத்தில, ஆயிரத்து தொள்ளாயிரத்து என்பதுகளில் இருந்து இன்றுவரை கொடிகட்டிப் பறந்த / பறக்கும் ஓவியர்களைப் பற்றி:

ஓவியர் ஜெயராஜ், 'ஜெ...' என்று மூன்று புள்ளிக‌ள் வைத்து ஆர‌ம்பித்தார் என்று நினைவு. எல்லோரும் கையெழுத்து போடும் போது, அப்ப‌டி ஒரு கோடு போட்டு, கீழே ரெண்டு புள்ளி வைப்பார்க‌ள். அது போல‌த் தான் இவ‌ர் மூன்று புள்ளிக‌ள் வைக்கிறார் என்று எண்ணினேன். பின் ஒரு பேட்டியில், அவ‌ரே சொல்லியிருந்தார், அது அவ‌ர் குடும்ப‌ உறுப்பின‌ர்க‌ளின் எண்ணிக்கை என்று. சிம்ப்ளி சூப்ப‌ர். அப்புற‌ம் குடும்ப‌ம் பெரிதாக‌ ஆக‌ புள்ளிக‌ள் கூடிக் கொண்டே சென்ற‌தைப் பார்த்தேன். 'ஜெ'வின் ஓவியங்கள் அருமையான உருவங்கள் மற்றும் அதன் shades கொண்டு நம் கண்களைக் கவரும். செக்ஸியா வரையறதிலும் இவரை அடித்துக் கொள்ள ஆளில்லை அப்போது. சில strokes தான், படம் அப்படி ஒரு attractive-ஆ இருக்கும்.

உருவங்களுக்கு எந்த அளவிற்கு ஜெ முக்கியத்துவம் கொடுத்தாரோ, அந்த அளவிற்கு முகபாவத்திற்கு முக்கியத்துவம் தந்தவர் ஓவியர் மாருதி. சீற்றம், நாணம், அமைதி, வேகம், என்று இப்படி எந்த ஒரு ஓவியத்தை எடுத்தாலும், முதலில் நம்மைக் கவருவது அந்த முக பாவங்கள். அத்தனை தத்ரூபமாக வரைந்திருப்பார். வண்ணக் கலவையும் bold-ஆ இருக்கும்.

கார்ட்டூன்களில் ஓவியர் மதன் இன்றும் உயரத்தில் இருப்பதை நாம் யாரும் மறுக்க முடியாது. ஏழை விவசாயி ஆகட்டும், வாழும் பெரும்புள்ளி ஆகட்டும், அவரது கார்ட்டூன் பார்க்கும் போதே நம்மில் ஒரு சிறு புன்முறுவலாவது உதிர்வது உறுதி. ஓவியத்தையும் தாண்டி வரலாற்று படைப்புக்கள், கேள்வி பதில் என்று மேலும் தன்னை மெறுகேற்றிக் கொண்டவர்.

ஆரம்ப காலங்களில் ம‌.செ. அவர்களின் ஓவியங்கள் அந்த அளவிற்கு சிறப்புடையதாய் இல்லை என்றே சொல்ல வேண்டும். கல்கியின் பல காவியங்களுக்கு ஓவியம் தீட்டிய மணியம் அவர்களின் புதல்வர். நாள் செல்லச் செல்ல ம.செ.வின் ஓவியத்தில் அப்படி ஒரு perfection. அதற்கப்புறம் தன் ஓவியங்களில் பல‌ அற்புதங்கள் படைத்தவர். சாந்தம், நளினம், இறையவர்கள் என்று உருவங்களிலும் மற்றும் வண்ணக் கலவையிலும் மெலோடியான ஓவியர். இவரது ஒரு கிருஷ்ணர் ஓவியம் பார்த்து, வரைந்து இத்தளத்தில் பதிந்திருக்கிறேன்.

கார்ட்டூனிஸ்ட் சித்தார்த் அவர்களின் பல கார்ட்டூன்களைப் பார்த்து நான் வியந்திருக்கிறேன், பின் வரைந்திருக்கிறேன். கார்ட்டூன் என்று கண்டபடி கோடுகள் போடாமல் அற்புதமாக‌ வரையும் ஓவியர். 'சிம்பிள் தான் சூப்பர்' என்று இவரது கார்ட்டூன்களைப் பார்க்கும் போது நமக்குப் புரியும். சிம்பிளான கார்ட்டூன்களிலும் கூட சிறு சிறு செய்திகளையும் சேர்த்து ஒரு நேர்த்தியாகப் படைப்பதில் வல்லவர். இவரோட இன்ஸ்பிரேஷனில் வரைந்த படங்கள் சிலவற்றை இத்தளத்தில் பதிந்திருக்கிறேன்.

Abstract ஓவியங்களைப் பார்க்கையில் Modern Art அவ்வளவாகப் பிடிப்பதில்லை. நம் இஷ்டத்திற்கு ஒன்று வரைந்து, பிறருக்குப் புரியாத காரணத்தால் அதற்கு நேர் மாறாய் நிறைய விளக்கங்களும் தரலாம் என்பது என் தாழ்மையான கருத்து. ஆனால் மருது அவர்களின் கோட்டோவியங்கள் சில நேரம் நின்று பார்க்க வைக்கும். பென்சில் கொண்டு அவ்வளவு நேர்த்தியா கோடு போடுவதே கடினம். இவர் என்னடா என்றால் ப்ரஷ் கொண்டு விளாசி அற்புதமாய்க் கோட்டோவியம் போடுகிறார் என்று வியந்தது உண்டு.

ஓவியர் அர்ஸ் படங்களும் ஆரம்பத்தில் அத்தனை ஈர்ப்புடையதாய் இல்லை. போகப் போக பல வித்தியாசங்கள் காண்பித்தவர். தொடர்கதைளில் கூட வித்தியாசமாகப் படம் வரைந்தவர். அதாவது ஒரு படத்தைப் பார்த்தால், அது இந்தத் தொடருக்கு வரைந்தது என்று கூறலாம். உருவங்கள், வண்ணங்கள் என்றில்லாமல், texture-லும் வித்தியாசம் காண்பித்தவர்.

சிறு வயதில் வாரப் பத்திரிகை என்று படித்தால் அது கல்கண்டு தான். அப்பா தான் படிக்கத் தூண்டினார். நிறைய தகவல்கள் அதில் இருந்து தெரிந்து கொள்ளலாம் என்று. நமக்குப் பிடிச்சதோ அதில் வரும் தொடர்கதை. எழுதியவர் தமிழ்வாணனா அல்லது அவர் புதல்வர் லேனாவா என்று நினைவில் இல்லை. அதற்குப் படங்கள் வரைந்தவர் ஓவியர் ராமு. குடும்பப் படங்கள் என்றால் நினைவில் வருபவர். கதாபாத்திரங்கள் நம் மனதில் அழுத்தமாக பதியுமாறு இருப்பதற்கு இவரின் ஓவியமும் ஒரு காரணமாக இருக்கும்.

இவர்கள் அனைவரையும் பற்றி சுருக்கமாக‌ச் சொல்ல வேண்டுமெனில்:

ஜெ - Soft & Sexy
மாருதி - Aggresive
மதன் - Captive Cartoons
ம.செ. - Mild & Sweet
சித்தார்த் - Creative Cartoons
மருது - Line dance
அர்ஸ் - Tender
ராமு - Old is Gold

இன்னும் பலர் இருக்கலாம். ஓவியர்கள் என்றவுடன் சட்டென்று மனதில் தோன்றியவர்களைப் பற்றி எனது எண்ணத்தை எழுதியிருக்கிறேன். உங்களுக்குப் பிடித்த/தெரிந்த ஓவியர்களைப் பற்றி பின்னூட்டத்தில் பகிர்ந்து கொள்ளுங்களேன்.

காளான்கள் - Water color

2009-02-15T20:10:00.000-08:00

வழக்கம் போல கைநிறைய புத்தகங்கள் எடுத்து வந்தேன் நூலகத்தில் இருந்து. நல்ல படமா இருக்கணும், வரையறதுக்கும் எளிதா இருக்கணும் என்ற கோணத்திலேயே, எதை வரையலாம் என அத்தனை புத்தகங்களையும் (படம்) பார்த்தேன். இந்த காளான்கள் சட்டென மனதை எட்டிப் பிடித்தன. நினைத்த மாதிரி எளிமையாவும் இருக்க, வரைய அமர்ந்தேன்.

6"x2" கட்டம் கட்டி ஒரு பென்சில் ஸ்கெட்ச். கட்டங்கள் அகற்றி முதலில் ஒரு மெல்லிய செபியா வாஷ் (Brown கலர்). அது காய்ந்தவுடன், அதை விட கொஞ்சம் அடர்த்தியான வாஷ். மூன்றாவது ஆங்காங்கே இருக்கும் மிக அடர்த்தியான Brown மற்றும் Black கலவை. நினைத்த அளவு ஈஸியா இல்லை. இரண்டு மணி நேரங்கள் ஒரே சிந்தனை என கட்டிப் போட்டது காளான்கள் :))

எங்க வீட்டு குட்டி தேவதை - Charcoal & Pencil

2009-02-08T20:00:00.000-08:00

பொதுவா புகைப்படங்கள் பார்த்து வரைந்து பழக்கம் இல்லை. ரொம்ப நாள் முயற்சி செய்யணும் என்ற எண்ணம் காற்றில் கரைந்த வண்ணம் இருந்தது. கரைய விட்டிருவோமா என்ன ?! குசேலனுக்கு அப்புறம், எங்க வீட்டு குட்டி தேவதையின் படம். சக்கி‍சீஸஸில் எடுத்தது. வரைபடம் போலவே இருந்த (இப்ப புரிஞ்சிருக்குமே சூட்சுமம் :))) அந்தப் படம் என்னை வெகுவாக ஈர்த்தது.

வழக்கம் போல கட்டம் கட்டி (5" x 4") 2b பென்சில் அவுட்லைன். பிறகு கட்டமெல்லாம் அகற்றி, சார்கோலில் தலைமுடி. அப்புறம் 2b பென்சிலில் ஷேட்ஸ். பேப்பர் கொண்டு ஷேட்ஸ் நல்லா ப்லென்ட் பண்ண, ஓரளவுக்கு எங்க வீட்டு குட்டி தேவதை போல (90% என்று சொல்லலாம்) வ‌ந்தது படம். எல்லாம் ஒரு மூன்று மணிநேரங்கள் ஆனது.

படத்தை முடித்து, அவங்க கிட்ட ஆவலா காட்டினா, அவங்களுக்கு அந்த அளவிற்கு நிறைவு இல்லை :((

அரசியல் தலைவர்கள் - Caricature

2009-01-26T20:17:00.000-08:00

தொன்னூற்றி ஐந்தில், ஆ.வி.யில் உதயன் அவர்களின் கைவண்ணத்தில் வந்த கேரிகேச்சர் ஓவியங்கள். பார்க்கறதுக்கு எளிதாக இருந்தாலும், ஒரு சில வரிகளிலேயே, இன்னார் என்று சொல்லும் அளவிற்கு வரைவது, கேரிகேச்சர் ஓவியங்களின் சிறப்பு எனச் சொல்லலாம்.

உதயன் அவர்களின் ஓவியங்களைப் பார்த்து, பிரமித்து, நான் வரைந்திருக்கிறேன் !!! அப்படியே, எப்படி இருக்குனு 'ஒரு வரி' சொல்லிட்டுப் போங்க ;))

போகீமான் - Clay

2009-01-18T19:35:00.000-08:00

நாம சாக்பீஸ்ல கொட கொடனு கொடயறத பார்த்துட்டு, எங்க வீட்டு குட்டீஸுக்கும் பயங்கர ஆசை. சரி பண்ணுங்கடா பசங்களானு விட்டால், லேசா மூனு மூலையில் கீறிவிட்டு, நட்டக்குத்தா நிக்க வச்சிட்டான் பையன். என்னாடா அதுனு கேட்டால், "ராக்கெட்" என்று பதில் வருகிறது :)))

போன வாரம் ஒரு நாள் "ஹாபி லாபி" போய் நமக்கு ஷாப்பிங் செய்தால், பசங்க அதுங்க பங்குக்கு ஒரு மினி ஷாப்பிங். அவங்க வாங்கியது கலர் கலரா களிமண் !!!

வெள்ளிக் கிழமை ஆரம்பிச்சாங்க. யானை, குதிரை, பூக்கள், பட்டாம்பூச்சி என போய், கடைசியில் அவங்க ஆஸ்தான போக்கீமானில் வந்து நிக்கறாங்க. சிவா தான் எல்லாம், தீக்ஷா அப்பப்ப அண்ணனைப் பார்த்து அதே போல செய்ய முயற்சி செய்வாள்.

வரிசையா செஞ்சு டி.வி. ரேக் மேல அடுக்கிட்டாங்க. அதிலிருந்து மூன்று சிற்பங்கள் உங்கள் பார்வைக்கு. பேர் எல்லாம் நமக்கு வாய்க்குள்ளயே வரமாட்டேன்கிறது. படத்தில இருக்கவங்க டியால்கா, மெகினீயம், க்ரோவைல்.

The Thinker - Water color

2009-01-18T10:19:00.000-08:00

அகெஸ்டே ராடின் அவர்களின் உலகப் புகழ்பெற்ற இந்தச் சிலையைப் பார்க்கும் போதெல்லாம், நாமும் என்னத்த சாத்தித்துவிட்டோம் என்று சிந்தனை ஊற்றெடுக்கும். கற்றது கைமண்ணளவே, இன்னும் மேலே போ என்பது போல நம்மையும் சிந்திக்க வைக்கும் இச் சிலையை வரைந்தது 92ல்.

One Color, different tones முயற்சி செய்ததும் சற்று வித்தியாசமாக இருந்தது. நீரின் அளவை வர்ணத்தில் எவ்வளவு சேர்த்தால், லைட் கலரில் இருந்து டார்க் கலர் கிடைக்கிறது என கற்றுக் கொள்ளவும் முடிந்தது.

Free hand drawing மாதிரி, Free brush drawing என்று சொல்லலாம் இப்படத்தை :))

வெண் இதய அன்னங்கள் - Chalkpiece carving

2009-01-12T06:14:00.000-08:00

வித்தியாசமா ஏதாவது செய்யனும் என்று யோசித்ததில், எப்போதோ எங்கோ பார்த்த இரு பளிங்கு அன்னங்கள் நினைவிற்கு வந்தன. இரண்டும் ஒன்றை ஒன்று பார்த்துக் கொண்டிருப்பது போல இருக்கும். அதன் நீண்டு வளைந்த கழுத்துக்கள் அப்படியே இதய வடிவில் ... இது தான் நம்ம சப்ஜெக்ட் இந்த சாக்பீஸ் கார்விங்கிற்கு.

எளிதாக எண்ணத்தில் தோன்றினாலும், செதுக்கிட்டே வரும்போது கழுத்து உடைந்துவிடும். இரண்டு மூன்று முறை தோற்று, பின்னர் பிறந்தன அன்னங்கள். இன்னும் டீடெய்ல் சேர்க்கலாம், உடைந்துவிடுமோ என பயம் :((

சென்ற பதிவில், செய்முறை விளக்கம் தந்தால் நன்றாக இருக்குமே என்றார் நானானிம்மா. இந்தப் பீஸும் முன்னரே செய்து விட்டதால், ஸ்டேஜ் பை ஸ்டேஜ் படம் எடுக்க முடியவில்லை.

இப்ப சிறு விளக்கம் பார்க்கலாம்: முதலில் சாக்பீஸை செவ்வகமாக செதுக்கிக் கொள்ளனும்.
இருபுறமும் சரி பாதி அளவிற்கு செதுக்கி .... செதுக்கி .... ம்.ஹிம். எழுத்தில் கொண்டு வரமுடியல ... அடுத்த கார்விங்கிற்கு படங்கள் நிச்சயம் :)))

சாக்பீஸ் ச்செய்ன் - Chalkpiece carving

2009-01-06T04:43:00.000-08:00

எல்லோரும் பத்தாவது படிக்கும்போது கொஞ்சம் சீரியஸா ஆகிடுவாங்க. கல்வியின் அடுத்த கட்டத்தை நிர்ணயிக்கும் வகுப்பு அல்லவா ?!!! ஆனால், நானும் என் நண்பன் ஒருவனும் (வழக்கம் போல கடைசி பெஞ்ச் :)) ரொம்ப தீவிரமா சாக்பீஸ் கார்விங்கில் இறங்கி விடுவோம். கார்கள் தான் எங்க ஃபேவரிட். குட்டிக் குட்டியா அழகா வெண் கார்கள், ரெடி ஆக ஆக, மற்ற நண்பர்களுக்கு சப்ளை ஆகும். நம்ம கையில் எதுவும் நிற்காது.

வந்த உடனேயே, "யாராவது போய் ஆபீஸ் ரூமில் இருந்து சாக்பீஸ் வாங்கிட்டு வாங்க" என்பது சில ஆசிரியர்களின் வழக்கம் எங்கள் பள்ளியில். உங்கள் பள்ளியிலும் இருக்கலாம் !!! யாராவது முன் பெஞ்சில் இருந்து எழுந்தா கூட, "நீங்க உட்காருங்க, இந்தாப்பா கடைசி பெஞ்சு, யாராவது போங்க" என்று சொல்லுவார்கள்.

ஒரு சாக்பீஸ் வைத்துக் கொண்டு மற்றவற்றை ஆசிரியரிடம் நீட்டுவோம். முதலில் டெஸ்கில் வரைய பயன்படுத்திய சாக்பீஸ், திடீரென்று ஒருநாள் காராக மாறியது. ஜாமெட்ரி பாக்ஸ் தான் ஆஸ்தான டூல் பாக்ஸ். முதலில் ஷேப் மட்டுமே செய்த கார்கள், நாளடைவில் ஜன்னல் எல்லாம் குடைந்து நன்றாக வர ஆரம்பித்தது. வேறு எதுவும் உருவ‌ங்க‌ள் செய்த‌மாதிரி ஞாப‌க‌ம் இல்லை.

அந்த‌ விடுமுறை நாளில், ஊருக்குச் செல்கையில் ஒரு பாக்ஸ் சாக்பீஸ் வாங்கி சென்றேன். பிள்ளையார், க‌ணிணி, ம‌ண்ட‌ப‌ம், ஷோஃபா, டேபில், ஸ்டூல், செயின் இப்ப‌டி நிறைய‌ தோன்றிய‌தை எல்லாம் செய்ய‌ முடிந்த‌து.

இந்த முறை இந்தியா சென்ற போது, அவற்றை எல்லாம் எடுத்து வரலாம் எனப் பார்த்தால், அவ்வளவு டெலிகேட்டா இருந்தது. அதனால் ஊரில் பத்திரமாக வைத்து விட்டு, இங்கு வந்து புதிதாய் செய்யலாம் என எண்ணினேன்.

இங்க 'சைட்வாக் சாக்' என்று கொஞ்ச பெரிய சைஸில் சாக்பீஸ் கிடைத்தது. சில சிற்பங்கள் செதுக்க, எதிர்பார்த்த அளவிற்கு, சுமாராகவே வந்தன அவை.

அவற்றிலிருந்து "சாக்பீஸ் ச்செய்ன்" உங்கள் பார்வைக்கு. முன்னெல்லாம் ஒரே நாளில் செய்ய முடிந்தது. இப்பொழுது சம்சாரி ஆகி, குடும்பமும் பெரிதாக :))) நேரம் அதிகம் கிடைப்பதில்லை. அதனால் இதை சுமார் இரண்டு மணி நேரங்கள் ஒரு நாளைக்கு எடுத்து, மூன்று நாட்கள் ஆனது நிறைவு செய்ய.

கவாஸ்கர், ரவி சாஸ்த்ரி, கபில் தேவ் இவர்களுடன் K.J.யேசுதாஸ்

2009-01-04T19:58:00.000-08:00

இந்த முறை இந்தியா சென்று திரும்புகையில் நிறைய புத்தகங்கள் எடுத்து வரணும் என்று நினைத்தேன். அது முடியவில்லை. புகைப்படங்கள் கூட எடுத்துவரமுடியவில்லை.

அப்பொழுது எனது ஷெல்ஃப் தோண்டுகையில், அதில் அந்த காலகட்டத்தில் வரைந்த படங்கள் சில ஒட்டி வைத்திருந்தேன். செல் அரித்து, அது கூட ஒரு கலை நயம் போல் காட்சி தந்தது. அப்படியே டிஜிட்டலில் க்ளிக்கிக் கொண்டேன்.

என்பது, தொன்னூறுகளின் கிரிக்கெட் நாயகர்கள் கவாஸ்கர், ரவி சாஸ்த்ரி, கபில் தேவ் மற்றும் பின்னணிப் பாடகர் கே.ஜே.யேசுதாஸ் அவர்கள். அந்தப் படம் இங்கே உங்கள் பார்வைக்கு. படத்தைக் க்ளிக்கி பெரிதாக்கி பாருங்கள்.

வீடு - Pencil Sketch

2009-01-03T15:27:00.000-08:00

தொன்னூற்றி நாலில், தமிழக வீடுகள் என்று குமுதத்தில் வந்த படம் என்று நினைக்கிறேன். முழுக்க பென்சில் தான். 2b பெசில் கொண்டு, அதைப் பார்த்து வரைந்த படம். ஷேட் வேண்டும் என்கிற இடத்தில், திக்கா போட்டு, பிறகு பேப்பர் வைத்து ஸ்மட்ஜ் செய்தேன். இப்பத் தானே பல எண்களில் பென்சிலும் கிடைக்கிறது :))

கிராமத்தில் எங்க வீடும் இதே போன்று தான் இருக்கும். நீண்டு அகன்ற தூண்கள் (எல்லாம் பர்மா தேக்கு), இறங்கிய தாழ்வாரம். முற்றத்தில் விழும் சூரிய வெளிச்சம் ... இப்படி எல்லாம் இப்படத்தில் இருக்க, அதுவே வரையவும் தூண்டியது.

அப்படியே எப்படி இருக்குனு ஒருவரி சொல்லிட்டுப் போங்க :))

சந்தை - Water Color

2008-12-28T09:04:00.000-08:00

என்பத்து ஒன்பதில் வரைந்த படம். அப்பொழுது வந்த காலண்டர் எல்லாமே அற்புதமாய், ஏதாவது ஒரு விதத்தில் நம் அனைவரையும் ஈர்ப்பதாகவே இருக்கும். அப்படி ஒரு காலண்டரில், இந்தப் படம் பார்க்கும் போதே, அதன் வண்ணக்கலவையில் மனம் கரைய, ப்ரஷ் பிடித்தேன்.

ரொம்ப அற்புதமா வந்திருக்கு என்றெல்லாம் சொல்லவில்லை. இன்னும் நல்லா ஃபினிஷிங் செய்திருக்கலாம். நிறைய தண்ணி போட்டா, பேப்பர் ஆட ஆரம்பிக்குமே என்று டச்சப் செய்யத் தோன்றவில்லை :))

படத்தைப் பார்த்து, அப்படியே ஒரு வரி, எப்படி இருக்குனு சொல்லிட்டுப் போங்க :))

இவரைத் தெரிகிறதா ?

2008-12-25T16:07:00.000-08:00

தொன்னூற்றி ஆறில் வரைந்த படம். 'இந்தியன்' திரைப்படம் வந்த காலகட்டமும் இதுவாகத் தான் இருக்கும். பிரமாண்டத்தை (மட்டுமே) எடுக்கும் இயக்குனரின் கைவண்ணத்தில், வித்தியாசமான கதைக் களத்தில் வந்த படம்.

இந்தியன் தாத்தா வேடத்தில் கமல் கலக்கியிருப்பார். அவரின் நடிப்பு மிக மிகக் குறைவு தான் இந்த வேடத்திற்கு. கேரக்டரின் வெற்றியை, லாவகமாக மேக்கப் கைப்பற்றியது என்று தான் சொல்லணும். அதே இன்ஸ்பிரேஷனில், நார்மல் 2b பென்சில் கொண்டு வரைந்த படம்.

ஜோக்'கடி'க்க வாரீகளா ? (நள பாகம் !)

2008-12-14T11:59:00.000-08:00

குமுதம், விகடன் படிக்கும்போது, நாமெல்லாம் ஜோக் படித்து, சிரித்து மகிழ்ந்து செல்வோம். ஆனா அந்த ஓவியங்களுக்கு ரொம்ப முக்கியத்துவம் தருவதில்லை. அவற்றை பார்க்கும்போது, ரொம்ப எளிதா இருந்தாலும், வரையும் போது தான் அதன் சூட்சுமம் புரியும்.

ஓவியர் சித்தார்த் அவர்களின் பரம ரசிகன் நான். தொன்னூறுகளில், அவரின் படங்களைப் பார்த்து வரைந்த ஏராளமானவற்றுள், ஓரளவுக்கு ஒற்றுமையுள்ள இரண்டு படங்களுக்கு ஜோக்'கடி'க்கலாம் வாங்க :)))

என்னத்த படிச்சாலும் ஒரு சாம்பார் ஒழுங்கா வைக்கத் தெரியுதா ? இந்த ஷோவுக்கு ஒன்னும் கொறச்சல் இல்ல !!!!

உங்கள் க்ரியேட்டிவிட்டியையும் பின்னூட்டுங்கள்.

நந்தி - Water Color

2008-11-09T17:59:00.000-08:00

அநேகமா எல்லா சிவன் கோவில்களிலும், சிவனைப் பார்க்கறோமோ இல்லையோ, நந்தியைக் பார்க்காமல் இருக்க முடியாது. சிவனைப் பார்க்கறதுக்கே இவர் கிட்ட பர்மிஷன் வாங்கி தான் பார்க்கணும் என்று நம் முன்னோர்கள் சொல்வார்கள்.

பொதுவாக, யாராவது குறுக்கே வந்தால், 'நந்தி மாதிரி ஏன் வழி மறிக்கிறாய்' என்று நையாண்டியும் செய்வார்கள்.

ஆத்திகமோ, நாத்திகமோ ... பார்த்தவுடன் பிடித்து வரைந்த படங்களுள் இந்த நந்தி தேவனும் ஒன்று, வருடம் 1992. அப்பதான் ப்ரஷ் பிசிறில்லாமல் என் கைக்குப் பழகிய நேரம். அதனால், பென்சில் அவுட்லைன் போடாமல், ப்ரஷ் கொண்டு வரைந்த சிம்பிளான ஓவியம்.

அமலா என்றால் அழகு - water color solo

2008-11-02T19:49:00.000-08:00

தொன்னூறுகளில், அநேக தமிழ் நெஞ்சங்களைக் கவர்ந்த சிறப்பான நடிகையாகத் திகழ்ந்தவர் அமலா. ஏதோ ஒரு அழகு அவரை மற்ற நடிகைகளிடம் இருந்து வேறுபடுத்தியது. ஐரிஷ் ஜீனாகக் கூட இருக்கலாம் :) அவரது கொஞ்சு தமிழும் மேலும் அழகு சேர்த்தது.

ஒரு புத்தகத்தில் பார்த்து இந்தப் படம் அப்போது வரைந்தேன். பென்சில் அவுட்லைன் போட்டு, ஒரே வர்ணம், வேறு வேறு ஷேட்கள், அவ்வளவு தான். கொஞ்சம் சிரத்தை எடுத்து ஸ்மட்ஜ் செய்திருக்கலாம். அப்போது முடியவில்லை. இப்போது தொட்டால் கிழியும் நிலையில் இருக்கிறது பேப்பர். அதனால் விட்டுவிட்டேன்.

படத்தைப் பார்த்து உங்கள் கருத்துக்களை மறவாமல் தெரிவியுங்கள்.

கலைவாணி - Single line drawing

2008-10-12T16:53:00.000-07:00

தொன்னூற்றி இரண்டுகளில் சென்னையில் வசித்த போது இந்தப் படத்தின் நகல் கிடைத்தது. அப்போது பொறுமையாக வரைய முடியவில்லை.

நெற்றி திலகத்தில் ஆரம்பித்து, முகம், தலை, வலது தோள், கைகள், இசைக் கருவி, இடது கைகள், கால், தாமரை, வலது கால், மீண்டும் தாமரை என்று வந்து அழகாக ஒரே கோட்டில் முடியும் படம். இப்படத்தை முதலில் வரைந்த ஓவியரின் திறமையை எண்ணினால் இன்றும் வியப்பே மிஞ்சுகிறது !!!

இப்போது கிடைத்த சில மணித்துளிகளில் அந்தப் படத்தைப் பார்த்து வரைந்தேன். வழக்கம் போல, படத்தைப் பற்றின உங்கள் கருத்துக்களை மறவாமல் தெரிவியுங்கள்.

குசேலா ..... இக்கடச் சூசூசூடு !

2008-07-02T11:34:00.000-07:00

வழக்கம் போல ரஜினியின் இந்தப் படத்திற்கும் ஏகப்பட்ட விளம்பரங்கள் வந்து கொண்டிருக்க ... சில வாரங்கள் முன்னர், என் நண்பன் ஒருவன் குசேலன் ஸ்டில்ஸ் அனுப்பியிருந்தான். படங்களைப் பார்க்கும்போதே தெரிந்தது இந்தப்படமும் சூப்பர் ஹிட் தான் என்று. அந்த அளவிற்கு அசத்தல். (ச‌மீபத்தில் பாடல்கள் கேட்டதில் இருந்து இந்த நம்பிக்கையில் சற்று சருக்கல் !)

அண்ணாமலை, எஜமான் டைப்ல ஸ்டில்ஸ் வருதேனு பார்த்துக்கிட்டே வந்தா, சட்டென நம்மை ஈர்த்தது இந்த 'ராஜாதி ராஜா' ஸ்டைல் ஸ்டில்.

கொசுவத்தி : எண்ணிக்கையில்லாமல் அந்த ஸ்டில்ல எத்தன முறை நண்பர்களுக்கு வரைந்து தந்திருப்பேன். அப்போது கல்லூரி பருவம். தேவகோட்டையிலிருந்து, காரைக்குடி சென்றோம் நண்பர்கள் சிலர். பாண்டியன் தியேட்டர் என நினைக்கிறேன். என்னா கூட்டம். அழகப்பா என்ஜினியரிங் மாணவிகள் அத்தனை பேரும் அங்கு தான். அட போங்கப்பா, சென்னையாவது, மும்பையாவது. நுனி நாக்கு ஆங்கிலம், வெள்ளைத் தோல், அட்டகாச ட்ரெஸ்ஸிங். என்ன ஒரு அலப்பரைங்கறீங்க !!!! கொடுமை என்னான்னா அதுங்க கூட ஏகப்பட்ட வில்லன்கள், சாரி ஹீரோக்கள் :))) நல்ல பிள்ளையாய் படத்த பார்த்துட்டு வந்தோம்.

இந்த நினைவுகளுக்கு இட்டுச் சென்ற ஸ்டில்லை வெகு சீக்கிரம் விட மனம் வரவில்லை. அதனால் வரையலாம் என இரண்டு நாட்களுக்கு முன்னர் அமர்ந்தேன். சார்க்கோல் பயன்படுத்தியதில்லை இதுவரை. அதுவும் வாங்கி ரொம்ப நாளா சும்மா கிடக்குது. சரினு அதை மீடியமாக பயன்படுத்தலாம் என்று நினைத்துக் கொண்டேன்.

படம் 10"x8" அளவு. முதல் நாள் பென்சிலில் கட்டம் கட்டி, அவுட்லைன் போடறதுக்கே மூன்று மணி நேரங்கள் பிடித்தது. பின் சார்க்கோல் கொண்டு தலைமுடிக்கு டை அடித்தேன் :) ஓரளவு நன்றாக வந்திருந்தது. அத்தோடு நிறுத்திக் கொண்டேன்.

நேற்று, நெற்றியில் சார்க்கோல் வைக்க, கரி அப்பியது போல் ஆகிவிட்டது. கையும் ஓடவில்லை, காலும் ஓடவில்லை. போச்சு, அவ்வளவு தான் என்று நினைக்க, சரி ஒரு ட்ரை விடலாம் என அழிப்பான் கொண்டு முயற்சித்தேன். கரி கரைந்து மிருதுவானது. அப்பாடா, பிழைத்தது படம் :)

கண்ணாடி மட்டும் சார்க்கோலிட்டு, அப்படியே பென்சிலுக்கு தாவினேன். ஷேட்ஸ் முழுதும் 2B to 6B பென்சில்கள். பின் டச்சப், பள்ளிகளில் செய்வோமே, அதே தான். பேப்பர் கிழித்து, சிறு துண்டுகளாய் மடக்கி, அப்படியே அழுத்தி அழுத்தி இழுக்கறது :)

முகம், கழுத்து, மாலைகள், பனியன், கை விரல்கள், வாட்ச் என எல்லா ஷேட்ஸ் முடிக்க ஒரு ஐந்து மணி நேரம் ஆனது.

இன்று, சுற்றிலும் உள்ள‌ கோடுக‌ளை அழித்து, லேசான‌ ட‌ச்ச‌ப் செய்து முடிக்க‌ ஒரு அரை ம‌ணித்துளிக‌ள். அப்புற‌ம் ஸ்கேன் ப‌ண்ணி, இப்ப‌ உங்க‌ள் பார்வைக்கு ந‌ம்ம 'சூப்ப‌ர் ஸ்டார் குசேல‌ன்'.

ம‌ற‌க்காம‌ ப‌ட‌த்த‌ பெரிது ப‌ண்ணி பாருங்க‌.

1. ஜோக்(கடி)க்க வாரீயளா

2008-05-02T21:06:00.000-07:00

வரையறதுல இருக்கற நுட்பம், வண்ணம் தீட்டுவதில் இல்லை என்பது எனது தாழ்மையான எண்ணம். ஏனெனில் கோடுகள் மட்டுமே பிரதானமாய் இருக்கும் பட்சத்தில் பொருமையாய் வரைவது சற்று சிரத்தையான காரியம் !

நாம் பத்திரிகைகளில் படிக்கும் (பார்க்கும்) கார்ட்டூன் ஜோக்குகள் அதே ரகம் தான். பார்க்க எளிதாய் தோன்றினாலும் வரைந்து பார்க்கும்போது தான் அதன் சூட்சுமம் புரியும். நிறைய ஜோக்குகளில் வந்த படங்கள் வரைந்திருக்கிறேன். அவற்றை ஒவ்வொன்றாய் பதிகிறேன். இது முதல் படம். பத்திரிகையில் என்ன ஜோக் என்று நினைவில் இல்லை. எனது எண்ணத்தில்:

"கஸ்டமர் புடி கஸ்டமர் புடினு கஷ்டப்படுத்தினீங்களே, நீங்களே வந்து பாருங்க, கலெக்ஷன் ஆனா தான் க்ரெடிட் கார்ட் ட்யூ கட்ட முடியும்னு சொல்றாங்க !"

உங்கள் மனதில் தோன்றுவதையும் பகிர்ந்து கொள்ளுங்களேன்.

Calla Lily - Oil on Canvas

2008-04-18T16:54:00.000-07:00

பல ஆண்டுகளாக வாட்டர் கலர் பயன்படுத்தி, அக்ரிலிக்கும் பயன்படுத்தி வந்திருக்கிறேன். ஆனால் இந்த ஆயில் பெயிண்டிங் மட்டும் பயன்படுத்தியதில்லை. ஒவ்வொரு முறையும் யோசித்து, அப்படியே விட்டுவிடுவேன்.

சமீபத்தில் (அலுவலக நிமித்தம்) ஒரு வகுப்பில், "நீங்கள் உங்கள் ஊக்கத்தை பன்மடங்கு பெருக்கி, தள்ளிப் போட்டு வந்த ஒரு காரியத்தை முடிப்பதாய் உறுதி எடுத்துக் கொள்ளுங்கள். ஐந்து வாரங்கள் கழித்து அதை நிறைவேற்றிய விதத்தைப் பகிர்ந்து கொள்ளுங்கள்" என்றனர். நமக்குத் தான் எல்லாத்துக்கும் ஒரு காரணம் வேண்டுமே :) இந்த வாய்ப்பைப் பயன்படுத்தி உறுதி எடுத்துக் கொண்டேன்.

அலைந்து திரிந்து ஆயில் பெயிண்டிங்க் தேவையானவை எல்லாம் வாங்கி, அதன் நுணுக்கங்களை இணையத்தின் வழி கற்று, இந்த "கேலா லிலி" வரைய அமர்ந்தேன். இரண்டு நாட்கள், சுமார் ஐந்து ஐந்து மணி நேரம் எடுத்தது படத்தை முடிக்க. ஆனால் வண்ணம் காய்வதற்கு ஐந்தாறு நாட்கள் ஆனது.

ஓரளவுக்கு 'லிலி' நினைத்த‌தை விட நன்றாக‌ வந்திருந்தது. படத்தை வகுப்பறையில் காண்பித்தபோது, ஒரே ஆரவாரம் தான் (அந்த அளவிற்கு படம் இல்லை என்பது உண்மை ;)). ஆனால் மனம் மிக திருப்தியானது அன்று.

படத்தைப் பெரிது செய்து பார்த்து, உங்கள் கருத்துக்களையும் பகிர்ந்து கொள்ளுங்கள்.

கார்மேகக் கண்ணா - பேனா எண்ணம், கணினி வண்ணம்

2008-04-05T20:18:00.000-07:00

(மறவாமல் படத்தைப் பெரிதுபடுத்திப் பாருங்கள்)

பதினோரு ஆண்டுகள் முன்னர் (1997ல்) பேனா கொண்டு வரைந்த படம். ஓவியர் ம.செ. அவர்கள் மிக அற்புதமாக கிருஷ்ணரை வரைந்திருந்தார். படத்தில் ஒரு வசீகரம் இருப்பதை உணர்ந்து, நாமும் வரையலாம் என்று அதைப் பார்த்து வரைந்தேன்.

வண்ணம் தீட்டாத அந்தப் படத்தை, தற்போது கணினி உதவியுடன் சுமாராக வண்ணம் தீட்டியிருக்கிறேன்.

படம் எப்படி இருக்கிறதென்று வழக்கம்போல உங்கள் கருத்துக்களைப் பகிர்ந்து கொள்ளுங்கள்.

கழுகு - நிழலோவியம் - Water Color

2008-03-20T16:42:00.000-07:00

ஏதாவது ஒரு படம், பார்க்கறதுக்கு அழகா இருக்கணும், வரையறதுக்கும் எளிதா இருக்கணும் என்று யோசித்து இந்தப் படத்தை வரைய அமர்ந்தேன்.

மூன்றே வண்ணங்களில், அரை மணி நேரத்தில் வரைந்த படம்.

மாலைச் சூரியனின் ஆரஞ்சு வானத்தில் கூட்டை நோக்கி விரையும் கழுகு, நம்ம வீட்டுச் சுவற்றை இப்போது அலங்கரிக்கிறது :)

திரு. சாம் வால்டன் - Pen and Ink

2008-03-10T04:27:00.000-07:00

இந்த U.S. மண்ண மிதிச்சு, கடந்த மூன்று வருடங்களில், சிறு பெறு நகரங்கள் சிலவற்றில் வசித்து இப்ப ஒரு சிற்றூரில் வசித்து வருகிறேன். அனைத்து இடங்களிலும் முதலில் shopping செய்யணும் என்றால், அங்கிருக்கும் நண்பர்களிடம், "இங்க பக்கத்துல எங்க வால்-மார்ட் இருக்கு ?" என்று தான் ஆரம்பிக்கும்.

வால்-மார்ட்டின் தந்தை திரு. சாம் வால்டன் அவர்களின் படம் ஒரு புக்மார்க்கில் கிடைத்தது. மிக அற்புதமாக அந்த ஓவியர் வரைந்திருந்தார். நாமும் இதனை வரைய வேண்டும் என்று பார்த்த மாத்திரத்திலேயே முடிவு செய்தேன்.

இந்த மாதிரி கோட்டு ஓவியங்கள் பார்க்கறதுக்கு எளிதாய் இருந்தாலும், வரையும் போது விரல் ஒடியும் அளவுக்கு கடினமான ஒன்று. தேவையானது "பொறுமையோ பொறுமை" மட்டுமே !!! கொஞ்சம் அப்படி, இப்படி விலகினாலும் படம் அதோ கதி தான். மற்ற வர்ண ஓவியங்களில் தவறுகளைச் சரி செய்ய ஏகப்பட்ட வாய்ப்புக்கள் அதிகம், ஆனால் கோட்டோவியங்களில் அப்படி இல்லை. இந்த‌ மாதிரி ப‌ட‌ங்க‌ளை எடுத்து வ‌ரைவ‌து ஒரு Challenging-ஆ, அதே நேரம் Intersting-ஆகவும் இருக்கும்.

இந்தப் பதிவையும் பாருங்க :

http://sithiram-pesuthadi.blogspot.com/2008/03/donald-daisy-ducks-water-color-work.html

Donald & Daisy ducks - Water Color - Work shop

2008-03-09T14:11:00.000-07:00

ஃப்ளாஷ்பேக் சிந்தனைகள் எப்படி கவிதைகளாய், கட்டுரைகளாய் வெளிப்படுகிறதோ, அதே போல் வரைதலிலும் சில ப்ளாஷ்பேக் படங்கள் இருப்பதை, இந்த முறை நூலகத்திற்குச் சென்றபோது உணர முடிந்தது.

குட்டீஸ்க்கு புத்தகங்கள் எடுக்கும்போது இவையும் கண்ணில் பட்டன. பள்ளி பருவத்தில் நிறைய வரைந்த படங்களுள் Micky Mouse, Donal Duck வகையும் ஒன்று. ஆனால் காலப்போக்கில், அவை நினைவில் இருந்து அகன்று விட்டன. அப்போது Daisy Duck இருந்ததில்லை.

பழைய ஆர்வம் திரும்பப் பெற்று, டோனல்டும், டெய்ஸியும் சந்தோசமாய் நடைபோடுவதை வரைந்திருக்கிறேன்.

முந்தைய பதிவுகளில் இருந்து சற்று மாறுபட்டு, இந்தப் பதிவில், படம் ஆரம்பம் முதல் முடிவு வரை ஏனைய படங்களுடன் விளக்கியிருக்கிறேன். உங்களுக்குப் பயனுடையதாய் இருக்கலாம் என்ற நினைப்பில் =;) வரைய ஆர்வம் உள்ளவர்கள் மேலும் வாசியுங்கள். இதுவரை வரைந்ததே இல்லை என்றாலும், முயற்சி செய்து பார்க்க அழைக்கிறேன்.

ஒரு ரூலர், பென்சில், ரப்பர் (Eraser), நீர் வர்ணப் பெட்டி, மிகச் சிறிய பெட்டி போதும் (சுமார் 12 வண்ணங்கள்). Round ப்ரஷ்கள் 0, 1 & 4. பேலட் (குழிகள் பல கொண்டு, வெவ்வேறு வர்ணங்கள் கலக்க ஏதுவான ஒன்று). சிறு குடுவையில் நீர். Tissue paper அல்லது பழைய துணி. இவையெல்லாம் பக்கத்தில் எடுத்துக் கொண்டு, ஒரு ஆறு மணி நேரத்தையும் ஒதுக்கிக் கொண்டு ஆரம்பியுங்கள். Wish you all the best !

இந்தப் படம் 7-1/2 க்கு 10 inches. முதலில், அசல் படத்தில் அளவுகள் இட்டுக் கொண்டு, பின் வரைய வேண்டிய தாளிலும். குறுக்கு நெடுக்காக ஒரு inch இடைவெளி விட்டு, குறித்து, கோடு போட்டுக் கொள்ள வேண்டும். மேலேயும், இடப்புறத்திலும் எண்கள் போட்டுக் கொள்ளவும். படத்தைப் பெரிது பண்ணி பார்த்தால் கட்டங்களும், எண்களும் நன்றாகத் தெரியும்.

இன்ச் அளவுகளில் கோடுகள், எண்கள் போட்டு பாதி நிலையில் வரைந்த படம்.

அசலில் எந்தக் கட்டத்தில் என்னென்ன இருக்கிறதோ, அப்படியே நகலில் மென்மையாக வரையுங்கள். தவறு நேர்ந்தால், திருத்தி வரையும் போது கை கொடுக்கும். இங்கே இருந்து ஆரம்பிக்கணும் என்று இல்லை. எந்தக் கட்டதிலும் ஆரம்பித்து, பொறுமையாக கட்டங்களை நிரப்பினால், படம் நன்றாக வரும்.

உருவங்கள் முற்றிலும் வரைந்த நிலையில் படம்.

வரைதல் நிறைவுற்ற பின், அதை ஒரு முறை சரி பார்த்துக் கொள்ளுங்கள். எல்லாம் நிறைவாய் இருக்க, தேவையில்லாத கோடுகளை அழித்து விடுங்கள். அப்படிச் செய்யும் போது, படமும் சில இடங்களில் அழிபடும். அதன் மேல் மீண்டும் வரைந்து கொள்ளுங்கள்.

தேவயற்ற கோடுகள் நீக்கி, வர்ணத்திற்குத் தயாராய் இருக்கும் படம்.

வர்ணத்தில் எப்போதுமே மெல்லிய (Light colors first) வண்ணத்தில் இருந்து ஆரம்பியுங்கள். இந்தப் படத்தில் மஞ்சள். மஞ்சளை பேலட்டில் பிதுக்கிக் கொண்டு, சிறிது நீர் விட்டு நன்றாக கலக்கி, ப்ரஷ்ஷில் வர்ணம் ஒரு stiff-ஆக இருக்கும் வரை பேலட்டில் வழித்து, வர்ணம் பூசவும்.

பின் அடுத்த மெல்லிய வர்ணம் என்று தொடருங்கள். வர்ணம் பூச நிறைய இடமிருப்பின் பெரிய எண் கொண்ட ப்ரஷ் பயண்படுத்துங்கள். இடம் குறையக் குறைய ப்ரஷ்களின் எண்ணையும் குறைத்துக் கொள்ளுங்கள்.

கறுப்பு வர்ணத்திற்கு (Finishing Touch) தயாராய் இருக்கும் படம்.

அவுட்லைனிற்கு Round ப்ரஷ் 0 எடுத்து, எந்த அளவு பொறுமை கையாள முடியுமோ அந்த அளவிற்கு நேரம் எடுத்து அவுட்லைன் போடுங்கள். ஏனெனில் Finish touch அல்லவா ! இந்தப் படத்தையும், இதற்கு முந்தைய படத்தையும் ஒப்பிட்டுப் பாருங்கள்.

வர்ணம் நிறைவு பெற்ற படம்

சில மணி நேரங்கள் விடுங்கள், படம் நன்றாகக் காயட்டும். பிறகு மேலும் தெரியும் பென்சில் கோடுகளை அழியுங்கள். படத்தைக் கணிணியில் ஏற்றி, சிற்சிறிய பிழை திருத்தி, Contrasting-ஆ ஒரு background-ம் போட்டால் அவ்வளவு தான்.

கலைவாணி - Pen and Ink

2008-03-02T18:20:00.000-08:00

1953ம் ஆண்டு ஆனந்த விகடன் "தீபாவளி மலர்" புத்தகத்தில் வெளிவந்த படம். பதின்மூன்று ஆண்டுகள் முன்னர் இப்புத்தகத்தை பார்க்க நேர்ந்தது. இந்தப் படம் பார்த்தவுடன், வரைய வேண்டும் என்று மனம் ஆசை கொண்டது.

இரண்டு அல்லது மூன்று மணி நேரம் ஆகி இருக்கும் படம் வரைந்து முடிப்பதற்கு. படத்தை க்ளிக்கி பெரிதாகப் பார்க்கவும்.

நளினம் - Pen and Ink

2008-03-01T20:33:00.000-08:00

இந்தக் காலத்துப் பொண்ணுங்க அழகில் ஒரு உயரத்தில் இருந்தாலும், அந்தக் காலத்து பொண்ணுங்க அளவுக்கு இயற்கையான அழகில் கொஞ்சம் பின்தங்கி தான் இருக்கிறார்கள் என்பது என் எண்ணம் ! (அழகுப் பெண்கள் அடிக்க வராதீர்கள் :))

அதே போல இப்ப வருகிற தீபாவளி மலர், பொங்கல் மலர் புத்தகங்களில் விளம்பரங்கள் தவிர்த்து, வேறு எதுவும் சிறப்பு கவனம் பெறுவது போல இல்லை. அப்ப வந்த மலர்கள் அப்படி இல்லை. ஒரு collectible என்று சொல்லலாம். அத்தனையும் பொக்கிஷம்.

அப்படி எங்கள் தாத்தா காலத்தில் வாங்கிய கல்கி தீபாவளி மலர், இன்றும் வீட்டில் உள்ளது. அந்தப் புத்தகத்தில் வந்த இந்தப் படம், பார்க்கும் போதே ஓவியரின் ரசனை என்னையும் ஈர்த்தது. என்ன ஒரு நளினம். பதின்மூன்று ஆண்டுகள் முன்னர், அப்படியே அதைப் பார்த்து வரைந்த ஓவியம். அரை மணி நேரத்தில் பேனா கொண்டு வரைந்தது. படத்தை க்ளிக்கி பெரிதாகப் பாருங்கள், உங்கள் கருத்துக்களைப் பகிர்ந்து கொள்ளுங்கள்

ஆனந்த தாண்டவம்

2008-02-25T11:56:00.000-08:00

தில்லை நடராஜரின் இந்தத் தாண்டவம் மிகப் பிரசித்த பெற்ற ஒன்று என்று நான் சொல்லத் தேவையில்லை. அதைப் பார்க்கும் போதெல்லாம் நமக்கும் எழுந்து ஆடலாம் என்று ஒரு உந்துதல் இருந்து கொண்டே இருக்கும். எனக்கு அதை வரைய வேண்டும் என்ற ஆசையில் ஒரு பழைய புத்தகத்தைப் பார்த்து, சுமாரா ஒரு பதினைந்து ஆண்டுகள் முன் வரைந்தது.

படத்தை க்ளிக்கி பெரிதாக்கிப் பாருங்கள்.

Scarlet Tanager - Water Color

2008-02-17T10:11:00.000-08:00

இந்த அமெரிக்கப் பாடும் பறவை ஸ்கார்லெட் டானெகர், பார்த்த மாத்திரத்திலேயே அனைவரையும் கவரக் கூடியது. குறிப்பாக அதன் சிவப்பு நிற மேனியும், கரு வாலும், இறக்கைகளும்.

சுமாரா வரைஞ்சிருக்கேன். படத்தைக் க்ளிக்கி பெரிதாய் பார்த்தால், படம் இன்னும் கொஞ்சம் நல்லா இருக்கும். பார்த்துப் பிடிச்சிருந்தா சொல்லுங்கள்.

தத்தித் தாவுது முயல் - Pen and Ink

2008-01-06T07:09:00.000-08:00

குட்டீஸ்க்கு பிடித்தமான வீட்டு விலங்குகளில் முயல் குட்டிகளுக்கு முக்கிய இடம் உண்டு. அவற்றைப் பார்க்கும்போது, தொட்டுப் பார்க்கத் தோன்றும். தூக்கிப் பார்க்கத் தோன்றும். சிறு வயதில் எங்கள் வீட்டில் முயல்கள் நிறைய வளர்த்தோம்.

சிறு குட்டிகளை எடுத்து தோள் பட்டைகளில் வைத்துக் கொள்வதில் ஒரு ஆனந்தம். துரு துருவென்று துள்ளிக் குதிக்கும் அவை, நம் மனதில் ஒரு ரம்மியத்தை ஏற்படுத்துவது நிச்சயம்.

இதுவும் ஒரு புத்தகத்தில் பார்த்து வரைந்தது. படம் பிடித்திருந்தால் பின்னூட்டத்தில் சொல்லுங்கள்.

Dora and Boots - Water Color

2008-01-01T10:43:00.000-08:00

மற்றுமொரு கார்ட்டூன் சித்திரம் 'Dora and Boots'. Dora என்றால் பெண் குழந்தைகளுக்கு ரொம்பப் பிரியம். என் மகளும் சேர்த்து. அவளுக்காக Water Color-ல் வரைந்தது. படம் எப்படி இருக்கிறது என்று உங்கள் கருத்துக்களைப் பகிர்ந்து கொள்ளுங்கள்.

வலையுலகக் குழந்தைகளுக்கும்,
வந்து வாசிக்கும் பெரியவர்களுக்கும்,
வாலிப இளையர்களுக்கும்,

வசதியாய் தமிழால் நம்மை இணைக்கும் தமிழ்மணக் குழுவினருக்கும்,

மற்றும் உங்கள் சுற்றம், நட்பு, அனைவருக்கும் 'சித்திரம் பேசுதடி' யில் இருந்து மனங்கணிந்த 2008ம் ஆண்டு புத்தாண்டு நல் வாழ்த்துக்கள் !

ஸ்பன்ஞ்பாப் ஸ்கொயர் பேண்ட்ஸ் - Water color

2007-12-15T18:58:00.000-08:00

குட்டிப் பசங்களுக்கு இந்த ஸ்பன்ஞ்பாப் என்றால் கொள்ளைப் பிரியம். எங்க வீட்டில இருக்க குட்டீஸும் சேர்த்துத் தான். பெரியவனுக்காக வரைந்து (22" x 28") அவன் ரூமில் மாட்டியிருக்கும் படம். இப்படத்தை இப்போ உங்களுடன் பகிர்ந்து கொள்கிறேன். நல்லாயிருந்தா ஒரு வார்த்தை பின்னூட்டிட்டுப் போங்க :)

Grey Wolf - Pen and Ink

2007-11-29T09:44:00.000-08:00

பொதுவா, இந்த மாதிரி மிருகங்களை வரையும் போது, நம்மைப் பார்ப்பது போல வரைவது சற்றுக் கடினம். அதனால இந்தப் படத்தைப் பார்க்கும்போது அது பிடித்திருந்ததால் வரைய ஆரம்பித்தேன். பின்னர் தான் தெரிந்தது, தோலின் மடிப்பு / சுருக்கத்துக்கேற்ப சிறு வரிகள் கடுமையாக இருந்ததையும். அப்படியே வரைந்திருக்கிறேன். நீங்கள் தான் சொல்ல வேண்டும் படம் எப்படி இருக்கிறது என்று.

அணில் - Pen and Ink

2007-11-23T09:42:00.000-08:00

அணில் தாவும் போதோ அல்லது அமைதியாய் ஏதாவது தேடிக் கொண்டிருக்கும் போதோ - ஏதேனும் சத்தம் கேட்டால், வாலை புஸ்ஸென்று வைத்துக் கொண்டு, கண்களையும் உருட்டி அங்குமிங்கும் பார்த்து கொள்ளும். அந்தக் காட்சி பார்ப்பதற்கு ரொம்ப அழகாய் இருக்கும். ஒரு புத்தகத்தில் அப்படி இருந்த காட்சியைப் பார்த்து வரைந்தது.

மர வீடு - Pen and Ink

2007-11-19T10:32:00.000-08:00

இங்கு Richmond, Virginia வந்த புதிதில், இரண்டு ஆண்டுகள் முன்னர் வரைந்த படம். வழக்கம் போல நூலகத்தில் இருந்து எடுத்து வந்த புத்தகத்தில், பார்த்தவுடனேயே வரையத் தூண்டிய படம். கோட்டோவியம் தான், இருந்தாலும் அந்த shades தான் வரைவதற்கு inspiration-ஆக இருந்தது.

சித்திரம் பேசுதடி - துவக்கம்

2007-11-13T13:54:00.000-08:00

வலையுலக அன்பர்கள் அனைவருக்கும் வணக்கம் !

சித்திரக்கலை மீது எனக்கு பால்ய பருவத்தில் இருந்தே ஆர்வம் உண்டு. எனது அப்பா நன்றாக வரையக்கூடியவர். அதனாலேயே ஆர்வம் எனக்கும் வந்திருக்கலாம் ;-)

என் அப்பா, அவ்வப்போது வரையற எல்லாத்தையும் ஒரு இடமா சேர்த்துவை, பின்னாளில் உதவும் என்பார். அது இந்த வலையுலகமா அமைந்ததில் பெருமை கொள்கிறேன். முக்கியமா உங்களுடன் பகிர்ந்து, உங்கள் கருத்துக்களை அறியவும் ஆவலாய் உள்ளேன்.

நிறைய வரைந்திருந்தாலும், என்னிடம் இருக்கும் flashback படங்கள் சிலவே. அவற்றை scan செய்து அவ்வப்போது பதிவிடுகிறேன். சிலவற்றின் தரம் சிறிது குறைவாய் இருக்கும். பொருத்துக் கொள்ள வேண்டுகிறேன்.

மற்றும் எனது நண்பர்கள் வரைந்த படங்கள், என்னைக் கவர்ந்த ஓவியர்களின் படங்கள், எல்லாம் இங்கு பதியலாம் என்றிருக்கிறேன்.

சில படங்கள் :

கவியரசர் கண்ணதாசன் - Pencil Sketch
Charlie Chaplin - Water Color
Violin - Water Color
Expression - Pencil

வழக்கம்போல வந்து உங்கள் ஆதரவைத் தொடர்ந்து தருமாறு கேட்டுக் கொள்கிறேன் !!!

சார்லி சாப்ளின் - Water Color

2007-11-13T09:44:00.002-08:00

இளங்கலைக் கல்லூரி முடித்து சென்னையில் சில மாதங்கள் இருந்தபோது ஒரு poster கடையில் இந்தப் படத்தைப் பார்த்தேன். பார்த்தவுடன் மனதை கொள்ளை கொண்ட படம். சார்லியின் expression வெகு அற்புதமாக உள்ள படம். அப்படியே வரைய முயற்சி செய்து வரைந்த படம்.

Violin - Water Color

2007-11-13T09:44:00.001-08:00

இந்தியாவில் பள்ளிப் பருவத்தில் Dyanora TV விளம்பரத்தில் வந்த படம். படத்தைப் பார்க்கும்போதே சட்டென ஒரு ஈர்ப்பு ஆட்கொண்டது. அந்த உந்துதலில் வரைந்த படம். முக்கியமா இந்தப் படம் பிடிக்கக் காரணம் இந்த lighting effect தான்

Expression - Pencil Sketch

2007-11-13T09:42:00.000-08:00

சிங்கையில் வசித்தபோது, சுமார் பத்து ஆண்டுகளுக்கு முன்னர் நான் வரைந்த பென்சில் ஓவியம். நூலகத்தில் இருந்து எடுத்து வந்த ஒரு புத்தகத்தில் இருந்தது இப்படம். பார்த்த அடுத்த நிமிடம் மனம் வரையத் தூண்டியது.

கவியரசர் கண்ணதாசன் - Pencil Sketch

2007-11-13T09:39:00.000-08:00

நண்பர் சுப்ராவின் மனைவி கீதா அவர்கள் எடுத்த black and white புகைப்படம். மன்னிக்கவும், பென்சிலில் வரைந்த படம்.

உற்று நோக்கின் வித்தியாசம் தெரியும். அல்லது புகைப்படம் என்றே எண்ணத் தோன்றும். அந்த அளவிற்கு மிகத் துல்லியமாக வரைந்திருக்கிறார்.

கைவிரல்கள், தலைமுடி, கைக்கடிகாரம் ... இப்படி எல்லாமே very detailed.

மேற்சொன்ன நண்பர் சுப்ரா, கீதா கண்ணதாசன் அவர்களின் நெருங்கிய உறவினர்கள் ஆவர்.